ТАРХИА ТЭЖЭЭЕ

"LIBERTARIAN SUMMER SESSION"

2008-08-01T04:03:54Z

[блог: ТАРХИА ТЭЖЭЭЕ,бичсэн: Tji]

Либертари зуны сургалт

Эрх чөлөөнд суралцаагүй хүн өөрөө эрх чөлөөнийхөө дайсан нь байдаг.

Монголын Либертари сан, Нээлттэй Академиас хамтран жил бүр уламжлал болгон зохион байгуулдаг "Либертари зуны сургалт" 2008 оны 8 дугаар сарын 11-нээс 15-ны өдрүүдэд "Дуган хад" амралтын газар болох гэж байна.

Хүмүүс бид төрөл садан, нутаг нуга, ярьдаг хэлнээсээ гадна үнэт зүйл, эрхэмлэх зарчим, нийгэмд хандах хандлагаараа ойлголцож, нэгдэж чаддаг билээ. Та зах зээл, ардчилал, иргэний нийгмийг эргэцүүлж, чөлөөт нийгмийн үндсэн зарчимуудтай танилцан, эрх чөлөөнд суралцсан таван өдрийг Либертари үзэл санаатай хамт өнгөрүүлэхийг хүсвэл бидэнтэй нэгдээрэй.

Жич: Сургалтын нэг хүнд ногдох зардал 140 000 төгрөг.

Та 60 000 төгрөгтэй, сургалтад суух хүсэлтэй, тэгээд мэдээж эхний 50 хүн дотор багтаад бидэнтэй холбогдвол сургалтад хамрагдах боломжтой. Бид сургалтын зөрүү зардлыг тань Либертари сангаас орчуулан гаргадаг номнуудын борлуултын ашгаас гаргах болно.

Энэ завшааныг ашиглан Либертари сангаас эрхлэн хэвлүүлсэн номыг худалдан авсан хүн бүхэнд талархал илэрхийлья!

Либертари зуны сургалтын талаархи дэлгэрэнгүй мэдээллийг

50106099, 99022416 утаснаас авна уу!

Сургалтын хөтөлбөр

2008.08.11 /Даваа гараг/

08.30 - 09.00 Бүртгэл

09.00 - 10.30 "Дуган хад" амралтанд очих

10.30 - 11.00 Байрлах

11.30 - 13.00 Танилцуулга хичээл:

Нүүр хагарцгаая

Бидний дүрэм /Spontaneous order/

13.00 - 14.30 Өдрийн хоол

14.30 - 16.00 Эрх чөлөөний философи

16.00 - 16.10 Цайны завсарлага

16.10 - 17.00 Иргэний боловсрол

18.00 - 20.00 Оройн хоол

21.00 - 23.00 Танилцах үдэшлэг

2008.08.12 /Мягмар гараг/

09.00 - 10.00 Өглөөний цай

10.00 - 11.20 Иргэний нийгэм

11.20 - 11.30 Цайны завсарлага

11.30 - 12.50 Хувийн өмч, чөлөөт зах зээл

13.00 - 14.30 Өдрийн хоол

14.30 - 16.00 Ардчилал

16.00 - 16.10 Цайны завсарлага

16.10 - 17.00 Туслах хичээл

18.00 - 20.00 Оройн хоол

21.00 - 23.00 Чөлөөт цаг

2008.08.13 /Лхагва гараг/

09.00 - 10.00 Өглөөний цай

10.00 - 11.20 Хүний эрх

11.20 - 11.30 Цайны завсарлага

11.30 - 12.50 Тэгш эрх

13.00 - 14.30 Өдрийн хоол

14.30 - 16.00 Шударга ёс

16.00 - 16.10 Цайны завсарлага

16.10 - 17.00 Туслах хичээл

18.00 - 20.00 Оройн хоол

21.00 - 23.00 Чөлөөт цаг

2008.08.14 /Пүрэв гараг/

Орчинтой танилцах аялал хичээл

09.00 - 10.00 Өглөөний цай

10.00 - 13.00 Аялал хичээл /Экологийн боловсрол, уламжлал/

13.00 - 14.30 Өдрийн хоол

14.30 - 17.00 Зочны цаг

18.00 - 20.00 Оройн хоол

21.00 - 23.00 Чөлөөт цаг

2008.08.15 /Баасан гараг/

09.00 - 10.00 Өглөөний цай

10.00 - 11.20 Эрх зүйт ёс, хязгаарлагдмал засаг

11.20 - 11.30 Цайны завсарлага

11.30 - 12.50 Дүгнэлт хичээл

13.00 - 14.30 Өдрийн хоол

14.30 - 16.00 …

16.30 - 17.30 Буцах бэлтгэл

17.30 Хот руу буцах

сэтгэгдэл бичих

[сэтгэгдэл бичих]

"БИД ХАМТДАА - ГЭРЭЛ ЗУРГИЙН АГШИН"

2008-06-05T11:00:00Z

[блог: ТАРХИА ТЭЖЭЭЕ,бичсэн: Tji]

Монголд анх удаа нэгэн зорилгын дор нэгдсэн олон хүний дүр төрхийг гэрэл зурагт мөнхлөх торгон агшинд та бүхнийг урьж байна.

Нэг дор олон хүнийг цуглуулан гэрэл зургийн нэг агшинд багтааж, үзэл бодлоо илэрхийлж, бүтээл туурвидаг урлагийн чиглэл олон улсад байдаг. Монголд анх удаа ийм бүтээл туурвихаар гэрэл зургийн Гамма агентлагын захирал, нэрт гэрэл зурагчин С.Цацралт шийдвэрлэжээ.

Ардчилсан намаас УИХ-ын сонгуулийн 25-р тойрогт нэр дэвшиж байгаа Хишигдэмбэрэлийн ТЭМҮҮЖИН-г дэмжигчид энэхүү өвөрмөц арга хэмжээг зохион байгуулна. Хэрэв Та хуульч Х.Тэмүүжин, түүний үзэл бодол, зарчим, хэрэгжүүлэх бодлогыг дэмжиж, түүний дуу хоолой нь таныг төлөөлөн УИХ-д дуугарч байх ёстой гэж үздэг бол, хэрэв та хуульч Х.Тэмүүжинг мэргэжилтнийх нь хувьд хууль тогтоох байгууллагад ажиллаж, Монгол Улсад шударга ёсыг бэхжүүлж, хуулийн тогтолцоог эрүүл, зөв болгоход мэдлэг боловсролоо зориулж чадна гэдэгт итгэдэг бол "Хүнээ мартсан нийгмийг бид хамтдаа өөрчилж чадна" цуглаанд нэгдэхийг урьж байна.

Та энэхүү "БИД ХАМТДАА - ГЭРЭЛ ЗУРГИЙН АГШИН"-д оролцсоноороо нэр дэвшигч Х.Тэмүүжингийн үзэл бодол, үйл ажиллагааг дэмжиж байгаагаа илэрхийлэхийн хамт, сонгуулийн сурталчилгаанд нь өөрийнхөө оролцоо, хувь нэмэрээрээ хандив оруулах боломжтой юм.
Гэрэл зургийг Гамма агентлагийн чадварлаг гэрэл зурагчид мэргэжлийн өндөр түвшинд авах болно.

Зураг авалтыг дэмжиж Монгол Улсын гавъяат жүжигчин Д.Сосорбарам, Баабар, шог зураач С.Цогтбаяр, дуучин Quiza нарын улс төр, урлаг соёлын төлөөлөгчид оролцох болно. Хэрэв Та эдгээр нэр хүндтэй хүмүүстэй хамт зургаа авахуулахыг хүсвэл, хэрэв Та нэр дэвшигч Х.Тэмүүжинтэй үзэл санаагаараа нэгдэхийг хүсвэл 2008 оны зургадугаар сарын 7-ний өдрийн 17 цагт Баянгол дүүргийн 4 дүгээр хороолол дахь Чингүнжавын гудамжинд байгаа Миний захын урд талбай дахь машины зогсоолд хүрэлцэн ирэхийг урьж байна.

Монголд хамгийн олон хүн багтаасан, хамгийн анхны гэрэл зургийн нүсэр том бүтээлд дүрээ мөнхөлж, УИХ-ын сонгуулийн 25 дугаар тойрогт Ардчилсан намаас нэр дэвшигч Хишигдэмбэрэлийн Тэмүүжинг дэмжиж байгаагаа илэрхийлж, шинэ урлагийн шилдэг бүтээлийг хамтран туурвицгаая.

"Бид хамтдаа - гэрэл зургын агшин" арга хэмжээний үеэр нэр дэвшигч Хишигдэмбэрэлийн Тэмүүжингийн сонгуулийн сурталчилгаанд хандив өргөх худалдаа явагдана.

Цаг хугацаан дотор түүхийг эгэл хүмүүс бүтээдэг. Бүтээсэн түүх нь харин хүмүүсийг эгэл биш болгодог. Эгэл хүмүүсийн эгэл бус агшинд нэгдэцгээе!

2008 оны зургадугаар сарын 7-ны өдөр Чингүнжавын гудамжинд уулзацгаая.

Холбогдох мэдээллийг 50106099 утсаар лавлана уу!

сэтгэгдэл бичих

[сэтгэгдэл бичих]

Сонгуулийн зардлын "Хандивын данс"

2008-06-02T09:49:00Z

[блог: ТАРХИА ТЭЖЭЭЕ,бичсэн: Tji]

Ардчилсан намаас УИХ-ын 2008 оны сонгуулийн 25 дугаар тойрогт нэр дэвшигч Хишигдэмбэрэлийн ТЭМҮҮЖИН би эрхэм сонгогч олон болон намайг дэмждэг нийт хүмүүст хандан сонгуулийн хандив хүсч байна. УИХ-ын сонгуулийн тойрог томорсноор нэр дэвшигчийн зардлын хэмжээ их болж, Баянгол дүүрэгт нэг нэр дэвшигчийн сонгуульд зарцуулах зардлын дээд хэмжээг СЕХ-ноос 133 сая 600 мянган төгрөгөөр тогтоосон.

Сонгуульд хэн их мөнгө зарна тэр сонгуулийн дараа эрх мэдлээ арилжиж, авилга авах нь их гэдэг. Сонгуулийн өмнөх мөнгө улс төрчийг хэн нэгний халаасанд оруулдаг гэлцэх нь бас бий.

Тиймээс Хишигдэмбэрэлийн ТЭМҮҮЖИН би эн тэргүүнд хамгийн бага зардлаар өрсөлдөж ялсан цэвэр улс төрч байхын төлөө энэ сонгуульд оролцох болно. Нөгөөтэйгүүр би Үндсэн хуульд заасан ард түмний элч, нийт иргэн, улс орны эрх ашгийг эрхэмлэн баримталсан "хууль тогтоогч" байхын тулд цөөн тооны хүмүүсээс бус нийт иргэд, дэмжигчдээсээ хандив авч, тэднийхээ итгэлийг даасан шиг дааж, хөрөнгө, мөнгийг нь ил тод, зөв зарцуулсан нээлттэй нэр дэвшигч байх болно.

Хэрэв Та:
- Намайг 2008 оны УИХ-ын сонгуульд Баянгол дүүргээс сонгогдохыг дэмжиж байгаа бол;
- Баялгийг, эрх мэдлийг, хөгжил дэвшлийг иргэдэд өгч, улс орны эзэн нь иргэд өөрсөдөө байх бодлого болсон Ардчилсан намын сонгуулийн мөрийн хөтөлбөр: "Эзэн монгол", "Иргэн бүрт эрдэнийн хувь", "Үйлдвэржилт", "Шударга ёс, иргэний нийгэм", "Шинэ Улаанбаатар", "Боловсролтой, эрүүл Монгол хүн"-ийг дэмжиж байгаа бол;
- Хишигдэмбэрэлийн Тэмүүжин миний намынхаа мөрийн хөтөлбөрийн хүрээнд дэвшүүлж буй
          Хууль нь шударга
          Төр нь цэвэр
          Бодлого нь зөв
          Иргэд нь чинээлэг - МОНГОЛЫН ТӨЛӨӨ бодлогыг дэмжиж байгаа бол;
- Хууль тогтоох байгууллагыг алсын хараатай, мэргэшсэн, зарчим ёс зүйгээ баримтлаж, хуулиа дээдлэн ажиллаж чадах хууль тогтоогчидтой болгохыг хүсэж буй бол УИХ-д нэр дэвшигч Хишигдэмбэрэлийн Тэмүүжин намайг дэмжиж, хандив өгнө үү

ХҮНЭЭ МАРТСАН НИЙГМИЙГ БИД ХАМТДАА ӨӨРЧИЛЖ ЧАДНА.

Хандивыг 2008 оны зургадугаар сарын 2-ноос зургадугаар сарын 27-ныг дуустал хүлээж авна. Сонгуулийн хуулийн дагуу хандивын хэмжээ иргэд нэг сая, байгууллага, аж ахуйн нэгж гурван сая төгрөгөөс ихгүй байхыг анхаарна уу.

Хүлээн авагч: Хишигдэмбэрэлийн ТЭМҮҮЖИН
Хандивын данс: Худалдаа Хөгжлийн банк 452 457 417
Утга нь: Сонгуулийн зардалд хандив

Хандивлагч Та өөрийнхөө гэрийн хаяг, ажлын газар, байгууллага, аж ахуйн нэгжийн нэр хаяг, утасны дугаараа бичээрэй. Би танд талархалын захиаг буцах хаягаар тань хүргэх болно.

Жич: Дор дурдсан иргэд байгууллагууд хандив өгөхгүй байхыг хүсье. Хэрэв өгсөн тохиолдолд буцаах болно.
- Төрийн болон төрийн өмчийн оролцоотой байгууллагууд
- Хадгаламж зээлийн хоршоо, түүний эзэд
- Гадаадын байгууллага, иргэд
- Уул уурхайн томоохон компаниуд

Хандив шилжүүлсэн тухайгаа мэдэгдэхийг хүсвэл мессежийг 99106099, 99022416 утсаар хүлээн авна.

сэтгэгдэл бичих

[сэтгэгдэл бичих]

ПАРКИНСОНЫ ХУУЛЬ БОЛОН МОНГОЛ ПАРАДОКС

2008-04-17T19:24:00Z

[блог: ТАРХИА ТЭЖЭЭЕ,бичсэн: Tji]

Сүүлийн үед үнийн өсөлтөөс болоод хүмүүс бухимдаж, олон талаар өөр хоорондоо маргаж, мэтгэж байна. Маргааны гол сэдэв нь: -"Төр оролцож зах зээл дээр нийтэд нь үнийг тогтоон барих ёстой. Тэгэхгүй бол энэ хэдэн шуналтай бизнесменүүд ашгаа бодоод иргэдийг бодохгүй байна". -"Үгүй ээ зах зээлд өөрт нь итгэж төр зөвхөн орлого багатай ядуучуудад хандан тухайлан тэдэнд л зориулсан халамжийн бодлого хэрэгжүүлэх хэрэгтэй. Төрөөс нийтэд нь үнэ зохицуулах гэвэл эсрэг үр дүн гарч орлого багатай иргэд хамгийн түрүүн хэлмэгдэх аюултай" гэх мэтчилэн.

Өнөөдөр сонгууль дөхсөнийг ч хэлэх үү, зарим нэг популист улс төрчдий дуу нь чангарсныг ч хэлэх үү, сүүлдээ үнийн өсөлт нь "даварсан хэдэн бизнесменүүдийг дараад өгөөч" гэсэн түрлэгтэй төрийн түшмэдийн сүр хүчийг нэмэгдүүлэх шалтаг болох тийшээ хандаж эхллээ.

Зах зээлд үнийг зохицуулна гэдэг зүгээр үнийг тогтоогоод барьчихна гэсэн үг биш. Үнэ өөрөө зах зээлийн гол мэдээлэл дамжуулагч. Үнийг зохицуулна гэдэг мэдээллийг засварлана гэсэн үг. Тиймээс үнийн зохицуулалт эцэстээ зах зээлийг бүхэлд нь алдаатай мэдээлэлд тулгуурласан "хөөсөн бөмбөлөг" болгож хэтдээ том хямралын үүдийг нээх аюултай. Харамсалтай нь монголд энэ аюул улам бүр бодит зүйл болж байгаа энэ үед асуудлыг шийдэхээсээ илүү асуудалд дөрөөлөн төр /түшмэдүүд/ улам их төсөвтэй, улам их эрх мэдэлтэй, улам их увайгүй болж байгаад би санаа зовж байна.

Санаа зовохдоо Байлыхүү гуайн блогд хоёр Паркинсоны тухай жижигхэн бичлэг байдгийг саналаа. Интернэт ухаж дахин уншлаа.

Дэлхийд хоёр Паркинсон байсан. Нэг нь 18-р зууны эцэст амьдарч байсан тархи мэдрэлийн саа өвчнийг судалсан эмч Жеймс Паркинсон. Нөгөө нь өдгөө 90 гарч байгаа Харвардын профессор удирдлагын ухаанд "Паркинсоны хууль" гэдэг нэр томьёог оруулсан Норткорт Паркинсон. Хамгийн гол нь энэ хоёр хүний нэр нь ижлээс гадна хоёулаа эрдэмтэн, судалж нээсэн зүйл нь бас өвчин. Ялгаа нь: нэг нь хүнд тусдаг өвчинг нээсэн бол нөгөө нь төрд тусдаг өвчинг нээсэн.

Төрд тусдаг Паркинсоны өвчин /хууль/ нь дараахь байдлаар тодорхойлогдоно.

- Хөрөнгийг төсвөөс дааж байвал төрийн түшмэл ямар ч байсан түүнийг бүрэн зарж чадна

- Төрийн орлого өсч байвал зардал заавал өсөх болно

- Төрийн түшмэдүүд нөгөө түшмэдийнхээ ажлыг л бий болгодог

- Албан тушаалтан өрсөлдөгчөө биш захирагдагч нараа олшруулах сонирхолтой байдаг

- Төрөөс мөнгө авагчид байнга хэцүүдэж дутагдаж, дээрээс мөнгө нэхсээр суудаг.

Төрд тусдаг албан тушаалын энэ өвчинг төсвийг багасгах замаар эмчилдэг. Харамсалтай нь дээрх өвчний бүх шинж монголын төрийн бүх шатанд илэрч, архагшсанаар барахгүй түүнийг эмчлэх арга болсон төсвийг багасгах биш харин ч улам ихэсгэж түүнийгээ хувааж идэхийн төлөө түшмэдүүд ухаангүй тэмцэлдэх болсон нь өнөөгийн бидэнд учирч байгаа гай зовлон. Ядаж байхад яр гэгчээр, сонгууль дөхөхөөр энэ өвчнөөр өвчлөгсөд улс төрд олширч, байгаа жаахан баялагаар сонгогчдоо хахуульдан, цөөн хэдэн бизнесменүүдээрээ сор залчих гээд байх нь бүр хэцүү.

Улс төрчдийн увайгүйгүйгээр буянтны дүр эсгэж тоглохоос гадна төрийн албаны ажил гэж худлаа баахан цаас үйлдвэрлэж, тоо хэлдэг нь хэтэрлээ. Хэрэгжиж, үр дүнд хүрсэн зорилт гэж бараг үгүй. Харин хэрэгжүүлсэн гээд л баахан худлаа ярих. Үнэндээ мөнгийг нь тоглоод, бизнес хийгээд, хувааж идээд дуусгачихсан. Үр дүн нь ядуурал, бухимдал, доромжлол. Нөгөө төрийн бодлогоор хямдрах, татварын хөнгөлөлттэй олон тонн будаа гурил хаана байна. Цаасан дунд, түшмэдийн ширээн дотор л байгаа байх.

Гэтэл бидний ихэнх нь баялаг бүтээдэг бизнесменүүдээ үзэн ядаж, тэдний ашиг, хуримтлалыг тонон дээрэмдэхийг төр засагт зөвшөөрч, албан тушаалтнуудыг өөгшүүлж байх юм. Төрд хандах сонирхолтой парадокс шүү. Нэг талаас тэгээд өг, ингээд өг гэх мэтчлэн төрөөс хийх хийхгүй олон зүйл шаардаж, эрх мэдэл, төсөв мөнгийг нь нэмэх мөртөө нөгөө талаас төрийг хариуцлагагүй, авилгажсан, эрх мэдэл нь хэтрээд үр ашиггүй зардал нь ихэдлээ гэж шүүмжлэх. Үнэндээ төрд туссан Паркинсоны өвчнийг олж хараад, шүүмжлээд байгаа мөртлөө түүний эмчлэх арга болсон төсөв танаж, хэмнэлттэй байлгах зарчмыг ажиллуулахгүй харин ч эсрэгээр нь төсвийг нь, эрх мэдэлтэй нь нэмэгдүүлж, халамж хүсэх байдлаараа төрийг данхайлгаад, өвчнийг нь улам хүндрүүлээд буй нь бидний парадокс.

Улс орнууд хөгжихийн тулд бизнесменүүдээ сонсож, түшмэдүүдээ хардан хянаж, иргэд нь баяжиж баялаг бүтээж байхад, бид харин эсрэгээр улс төрчдөө сонсож, бизнесменүүдээ хавчин гадуурхаж, түшмэдүүд нь баяжиж байна. Бусад улс баялагийг зах зээлийн дүрмээр хувааж, иргэдийнхээ дийлэнх олонхийг өөрийн бизнестэй, баялаг бүтээгч дундаж иргэн болгох гэж зорилго тавьж байхад бид баялгийг улс төрөөр хуваарилуулж, иргэдийнхээ олонхийг төрийн гар харж, халамжаар амьдрах ядуу "тэжээвэрүүд" болгон хувиргаж байна.

Үнэхээр ч өмчийн хууль тогтоомж болон бизнессийн орчин нь байнга өөрчлөгдөж, бодлого нь тодорхойгүй, аливаа шийдвэрийг эрх мэдэлтнүүд нууцаар гаргаж буй тохиолдолд ур чадвартай нь бус харин эрх баригчидтай холбоо сүлбээтэй нь бизнест амжилт олдог гэдэг. Монгол улсад ийм дүр зураг ажиглагдаад удаж байгаа. Удаад зогсохгүй уламжлал болон тогтнож байгаа. Хуулиас хүчтэй эрх дархтны зан аашийг дагах гэж олон бизнес зовж байхад, төрийн түшмэдүүд тэднээс илүү ашгийг төсвөөс уутлан авч байна. Монгол улсад баялаг бүтээж, хөгжлийг бий болгодог хүмүүс нь цөөдөөд, даргалж, зандачиж, хувааж иддэг нь ихдээд бизнес эрхлэх нь зүгээр сууснаас хэцүү, бэрхшээлтэй болж буй нь үнэн. Бизнес эрхлэгчид өөрийн бизнесийг өргөжүүлэхээс илүүтэй одоо байгаа бизнесээ хамгаалж улс төрийн өмгөөлөл, хамгаалалтай болоход санаа зовинож, бизнесийн шинэ салбарт хөрөнгө оруулалт хийх биш, улс төрд мөнгө хаях нь ч бас ихсэж байна. Гурил будаа, талхны үнийг хөөрөгдөж буй дотоод шалтгаан ердөө л энэ.

Өнөөдөр дэлхий нийтээр хүнсний хомсдолд орж, улс орон бүр хямралыг хэрхэн даван туулах вэ хэмээн гарц хайж байхад Монголчуудын бид бүх бурууг цөөн хэдхэн баялаг бүтээгчиддээ тохож, харин араар нь популист улс төрчид болон авилгач түшмэдүүд нь буянтай сайхан царайлан сонгуульдаа бэлтгээд сууж байна.

Хуулиар хамгаалагдаагүй, төрөөс хамааралтай хөрөнгө баялаг гэдэг зах зээлд үнэ цэнэгүй, эзэндээ үр ашиггүй, байнгын эрсдэлд байдаг нь үнэн. Энэ эрсдлээ бизнесүүд улс төрд татварлаж, улс төрчдийг тэтгэж байж багасгадаг. Энэ нь эцэстээ улс орныг олигархижсон эдийн засаг, төржсөн зах зээлд аваачдаг.

Уул нь бизнесийн орчинд ажиллах төрийн үйлчилгээний гол зарчим бол иргэний, бизнесийн санаачлагын урд хөндөлдөж, элдэв хураамж зөвшөөрлөөр хориг тээг хийх биш, харин араас нь дэмжин, хэрэглэгчийн эрх ашгийн үүднээс стандарт сахиулах явдал билээ.

Олон юм ярилгүй алсаа харан, монголын ирээдүйг жаахан ч гэсэн сайн сайхан руу нь өөрчилж, өнөөгийн баялаг бүтээгчиддээ зориулж улс төрчдийн хийж чадах ёстой зүйлс бол үнийг тогтоож, төрийг хүчирхжүүлэх бус харин хууль тогтоомжоо ойлгомжтой, төрийн албаа хүндрэлгүй, шүүх цагдааг шударга болгож, боловсролын бодлого нь улс орны эдийн засгийн хэрэгцээг хангахуйц, дэд бүтэц нь бизнес эрхлэгчиддээ хүртээмжтэй, банк санхүү нь иргэдийн бизнес санаачлагыг дэмжих тийм нөхцөл боломжоор хангах юм.

сэтгэгдэл бичих

[сэтгэгдэл бичих]

Сэтгэгдэл

2008-04-01T22:59:00Z

[блог: ТАРХИА ТЭЖЭЭЕ,бичсэн: Tji]

Өнгөрсөн сард www.news.mn сайтад тавигдсан нэг нийтлэлийн маань дор ийм нэгэн сэтгэгдэл "Ярьсаар л байна уу?" гэсэн гарчигтай бичигдсэн байлаа.

Болохгүй бүтэхгүй байгааг нь бүгд л мэдэж байгаашдээ. Яах ёстой талаар ч өчнөөн жил ярилаа. Одоо бодитой дорвитой ажил хийхгүй юм бол элдэв шалдав юм бичиж цаг үрхээ болимоор юм. 2007 оны 10 сарын 19

Энэ сэтгэгдэлд хариу болгож бас нэг зочин:

Тэр бодитой доривтой ажлыг чинь хийгээд өгий гэж эрх мэдэл авсан хүмүүсээс наадахаа нэхээч ээ. Судлаачдын ажил чинь бичиж, хэлэх л байдаг юм биш үү. Шаардах юм аа шаардах хүнээс нь шаардаж чадахгүй, албан тушаалтан хархаараа долигнож, бөхөлзөх мөртлөө бичиж, ярьдаг хүмүүсээс болохоор "хийсэн, бүтээсэн юу байгаа юм" энэ тэр гээд л хаа хамаагүй зүйл нэхээд байх юм. Бичсэн нийтлэлийг нь уншиж байна гэдэг чи бүтээсэн юмыг нь хэрэглэж байна гэж ойлгодоггүй юм уу. Оюуны хөдөлмөрийг олж харж, үнэлж чадахгүй байшин савнаас өөр юм бодитой гэж ойлгодоггүй, өөрөө юу ч хийдэггүй мөртөө бусдаас юм шаардаад байдаг хүмүүс Монголд харин олон байдаг юм биш үү. Тэр шаардаад байгаа зүйлийг чинь эрх мэдэлтэй мяндагтангууд нь хийх ёстой болохоос гудамд байгаа үзгнээс өөр зэвсэггүй судлаачид бичиж, хэлэхээс өөр юу хийхэв дээ. 2007 оны 10 сарын 24

сэтгэгдэл бичих

[сэтгэгдэл бичих]

Зогсолт

2008-03-22T21:15:00Z

[блог: ТАРХИА ТЭЖЭЭЕ,бичсэн: Tji]

Байз даа...

Түр хүлээ!

Би өөртөө зогсолт өгмөөр байна

Санаж байна

Сэтгэл яг ингэж анирдахад

Цаг ямагт намайг живүүлэх

Царцанги сүнстэй саарал хүмүүс урсч байсан

Тэдний хөггүй инээмсэглэл,

харц

бас царай

Энэ бүхэн урьд нь

Этгээд мөртөө зүүд шиг

Заавал өрнөж байсныг

... Тийм ээ

Дүр эсгэх хуурамч харцнууд

Дотроо халхалсан хиймэл үзэмжүүд

Тэнгэр минь хүлээ л дээ

Хэмжээс бүхэн цаг хугацаатайгаа зогсог

Хэрхэхийн тухай утга ч хийсэн одог

Бид нэг л замыг давтаад байна

Бийр будаггүй амьдралын цаг хугацаа

Бүгдийг "хүн" гэдэг хүүхэлдэй болгон наадаж байна

Бид орон зайн тоглоом болж

Бие мөхөс оюун зайд хүүрнэл болон хувирч байна

Авралт ухаарал чи зүүднээс минь сэрээгээд

Аянга буулган ниргээд өгөөч

Аан ...

Ийм мэдрэмжийг аль эрт төлөвлөчихсөн байж

Зурсан зураг, заяа тавилан тэгээд надад

... үгүй ээ,

би энд л зогсолт өгмөөр байна

Зуурхан ч гэсэн

Бүх зүйлийн өнгө, хэмнэлийг умартан

Би өөрөөр ухаармаар байна

Өөрийгөө!

Байз хүлээ намайг...

сэтгэгдэл бичих

[сэтгэгдэл бичих]