TUVSHEE'S BLOG/TAVAN TSAGARIG/

Олимпийн аваргадаа итгэж болноо

2008-08-27T19:16:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

Хэдхэн хоногийн өмнө өндөрлөсөн зуны Олимпийн XXIX наадамд манай Монголын тамирчид одтой сайхан наадаж, ихэр алт, ижил мөнгөн медалийг эх орон, ард түмэндээ авчирсан билээ. Аливаа сайн зүйлд атаархагсад, хорсогчид дандаа байдаг болохоор Азербайжаны зарим хэвлэл мэдээллийн хэрэгслээр, тэр ч байтугай Залуучууд, Спортын яамны сайд нь хүртэл “Монголын анхны Олимпийн аварга Н.Түвшинбаярыг “допинг” хэрэглэсэн нь шалгалтаар нотлогдсон. Тэгэхээр түүнд ялагдсан манай тамирчин мөнгөн медаль авах болно” гэх мэтээр элдвээр гүжирдсэн. й

Хэдийгээр энэ үгийг манайхан үл тоож, огтхон ч эргэлзэхгүйгээр Олимпийн аваргадаа итгэж байгаа боловч баттай эх сурвалжаас бас тодотгож, худал цуурхалд цэг тавихыг хүслээ.

Юуны өмнө Монголын Үндэсний Олимпийн Хорооны дэргэдэх Допингийн эсрэг төвийн мэргэжилтэн Н.Цогтсайхантай холбогдож энэ талаар тодруулахад “Энэ бол огт худлаа цуурхал. Манай төв Олимпийн өмнө бүх тамирчдаасаа допингийн шинжилгээ авсан. Ямар ч зөрчил гараагүй ээ. Энэ талаар итгэлтэй байж болно” хэмээн хариулав.

Манай хүнийг цэнхэр өнгийн юм барилдахынхаа өмнө уусан гээд бичсэн байсан гэнэ лээ. Тэр нь “Shilena” гэдэг нэртэй ердийн хүнсний нэмэлт тэжээл байсан гэдэг нь ч тодорхой болов. Нээрээ ч тийм л допинг хэрэглэх юм бол юу гэж л тэр олон хүний нүдэн дээр ив ил уугаад, идээд сууж байв гэж дээ, энэ азербайжанууд бүүр инээд хүргэчих юм аа.

Эцэст нь Дэлхийн допингийн эсрэг агентлаг (WADA) гэж байгууллага бий. Энэ байгууллагын гаргасан Дэлхийн допингийн эсрэг дүрэм гээд бий. Энэ дүрэм нь уралдаан тэмцээний үед допингийн шинжилгээ авах үйл ажиллагааг зохион байгуулах эрх зүйн үндсэн баримт бичиг юм. Дэлхийн Допингийн эсрэг агентлаг /WADA/, Олон Улсын Олимпийн Хорооноос батламжилсан энэхүү баримт бичиг нь допингийн тодорхойлолт, шинжилгээ хийх аргачлал, хариуг зарлах, допингийн шалгалтанд унасан тамирчдад хүлээлгэх хариуцлага, хориотой эмийн жагсаалт зэрэг допингийн хяналтын үйл ажиллагаатай холбоотой бүх зохицуулалтыг багтаадаг.

Энэ дүрэмд Олимпийн наадмын үеэр допингийн тухай асуудлыг 24 цагийн дотор мэдэгдэн эцэслэн шийдвэрлэнэ гээд цагаан дээр хараар биччихсэн байна. Тэгвэл манай Н.Түвшинбаяр наймдугаар сарын 14-нд алтан медаль авсан. Түүнээс хойш 24 цаг байтугай хорь гаруй хоног болчихсон байгаа биз дээ. Ингэхээр дахин хэлэхэд огт үндэсгүй энэ дэмий ярианд олн түмэн минь анхаарал хандуулсны хэрэггүй ээ. Олимпийн аваргадаа итгэж болноо.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

МОНГОЛ ХОЁР БОКСЧИН ОЛИМПИЙН АВАРГЫН ТӨЛӨӨ

2008-08-22T09:51:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

МОНГОЛ ХОЁР БОКСЧИН ОЛИМПИЙН АВАРГЫН ТӨЛӨӨ

Зуны олимпийн XXIX наадмын боксын тэмцээний хагас шигшээ тоглолтууд өнөөдөр болж байна. Манай хоёр боксчин хагас шигшээд шалгаран үлдсэнийг Та бүхэн сайн мэдэж буй.

48 кг-ийн жинд ОУХМ , Ази тивийн аварга Пүрэвдоржийн СЭРДАМБА мөнгөн медалийн төлөө Кубын боксчин, Пан Америкийн аварга Ямпьер Эрнандестай “тулалдахаар” эхлээд рингэнд гарлаа. Кубын бокчсноос манайхан дутах юмгүй , ялах бүрэн боломжтой гэдгийг З.Энхзориг маань харуулсан. Тиймээс ч Сэрдамба маань сайхан зоригтой тулалдлаа. Эхний раундад манай хүн нэг оноо салгаж, 1:0-ээр хошуучилсан. Харин хоёрдугаар раундад хоёр боксчин бие биенээсээ хоёр хоёр оноо авлаа. Гэхдээ манай Сэрдамба нийт оноогоор 3:2-оор тэргүүлсэн хэвээр. Гуравдугаар раундад Кубын Эрнандес тулааны тактикаа өөрчилж, ихэд шаргуу довтолж тоглосны үр дүнд 3.5-аар энэ раундад хошуучилж, нийт оноогоор Кубын тамирчин 7:6 –аар илүү боллоо. Шийдвэрлэх дөрөвдүгээр раундад манай Сэрдамба эхлээд нэг оноо алдан хоёр оноогоор хожигдож явсан ч тоглолтын төгсгөлд оноогоо нөхөн цаг дуусахын өмнөхөн 8:8 болголоо. Ингээд тулааны хугацаа дуусаж, хажуугийн шүүгчдийн дарсан сул оноогоор ялалтын эзнийг тодруулахад дэвжээний шүүгч улаан булангаас гарч тоглосон Монголын Пүрэвдоржийн СЭРДАМБЫН гарыг өргөн ялалтыг зарлалаа. Ийнхүү Монголын боксчдоос олимпийн анхны мөнгөн медалийн болзлыг хангаж, монгол “ширэн бээлийтэн” анх удаа Олимпийн аварга цол, алтан медалийн төлөө тоглох боллоо. Алтан медалийн төлөө П.Сэрдамба маань БНХАУ-ын тамирчин дэлхийн хошой аварга, олимпийн хүрэл медальт Зү Ши Минтэй тулалдах юм.

Монголчуудын маань сэтгэлийн хөөрөл намдаж амжаагүй шахам байхад, тодруулбал нэг тулааны дараа 54 кг-ийн жинд Монгол Улсын гавьяат тамирчин Энхбатын БАДАР-УУГАН мөн л мөнгөн медалийн төлөө Молдавын Вечяслав Гоянтай өрсөлдөв. Манай боксчин эхнээсээ л илт давамгайлж, хурд, хүч, тактикаар илүүрхсэн. Эхний раундад 3:0-ээр, хоёрдугаар раундад 6:1-ээр, 2:1-ээр, төгсгөлийн дөрөвдүгээр раундад 2:0-ээр тус тус хожиж, 13:2 –оор илт давуу ялж, Монголын хоёр боксчин ОЛИМПИЙН АВАРГЫН төлөө тулалдах боллоо. Ууганн маань алтын төлөө Кубын боксчин Янкель Леон Аларконтай хүч үзнэ. Манай хоёрын тулаан наймдугаар сарын 24-нд буюу олимпийн хаалтын өдөр Бээжингийн цагаар 13:30 цагаас Сэрдамба, 14:06 цагаас Бадар-Ууган маань рингэнд дараалаад гарах юм.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

О.ГҮНДЭГМАА МӨНГӨН МЕДАЛЬ ХҮРТЛЭЭ

2008-08-13T13:13:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

“Бээжин-2008” Зуны олимпийн XXIX наадмын эмэгтэйчүүдийн спорт гар бууны 25 метрийн дасгал дөнгөж сая өндөрлөв. Монгол Улсын гавьяат тамирчин Отрядын Гүндэгмаа урьдчилсан буудлагад Олимпийн рекордыг давтан, нэгээр финалд шалгаран, Монголчууд бид ч Олимпийн анхны аваргаа “өлгийдөн” авахаар догдлон хүлээж байлаа. Финалын буудлагад БНХАУ-ын тамирчин, 2006 оны дэлхийн аварга Чэн Янь тун сайн буудаж, манай тамирчны өмнө орон, Биднээс алтан медалийг маань “булаан” авлаа. Ийнхүү Гүндэгмаа дөрөв дэх Олимпоосоо мөнгөн медалийг Эх орондоо авчирч, Олимпоос медаль хүрсэн 16 дахь монгол хүн, хоёр дахь олимпийн медальт монгол бүсгүй, анхны мөнгөн медальт эмэгтэй тамирчин болж, Бээжингийн тэнгэрт алтан соёмбот далбаагаа мандууллаа. Монголын эмэгтэй тамирчдаас анхны олимпийн медалийг хүртэж байсан Доржсүрэнгийн Мөнхбаяр 16 жилийн дараа Олимпийн хүрэл медалиа ихэрлүүлэв. Хэдийгээр Германы нэрийн өмнөөс оролцсон ч шагналын тавцанд хоёр монгол хүн зогсож буйг харахад хичнээн таатай, монгол цус, монгол хүний авьяас чадлаар бахархахгүй байхын аргагүй байлаа.

Эмэгтэй 25 метрийн спорт гар буу. Шигшээ буудлага

Алтан медаль.Чэн Янь (БНХАУ) 793,4 оноо

Мөнгөн медаль.Отряд ГҮНДЭГМАА (МОНГОЛ) 792,2 оноо

Хүрэл медаль.Доржсүрэн МӨНХБАЯР (Герман) 789,2 оноо

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

ОЛИМПИЙН ӨДРИЙН ТЭМДЭГЛЭЛ-VIII.09

2008-08-09T11:41:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

ОЛИМПИЙН ӨДРИЙН ТЭМДЭГЛЭЛ-VIII.09

Өнөөдөр буюу наймдугаар сарын есөнд “Бээжин-2008” олимпийн наадмын анхны медальтнууд тодорч эхэллээ.

БУУДЛАГА: Эмэгтэйчүүдийн урт бууны 10 метрийн дасгалд манай Зоригтын БАТХУЯГ оролцов. Урьдчилсан буудлагад тэрбээр 394 (98+99+100=97) оноо авч 47 тамирчнаас 22 дугаар байр эзэллээ. Хэрэв Батхуяг дөрөв дэх оролдлогоо 100 оносон бол нийлбэрээр 397 авч (шигшээ буудлагад наймдугаар байраар шалгарсан Францын тамирчин 396 оноо авсан) финалын наймд шалгарах боломж байлаа.

Энэ төрөлд Чехийн Катарена Эммонс олимпийн рекордыг шинэчлэн аварга боллоо. Урьдчилсан буудлагад тэрбээр ганц ч оноо алдалгүй 400 (100+100+100+100) бол шигшээ буудлагад 103,5 оноо авчээ.

Эмэгтэй . Урт бууны 10 м.

1.К.Эммонс (Чех) 503,5 оноо (Олимпийн рекорд)

2. Л.Галкина (ОХУ) 502,9 оноо

3.С.Пейчич (Хорват) 500,9 оноо

Эрэгтэй: Хийн гар бууны 10 м.

1.Пан Вэй (БНХАУ)

2. Жин Жон О (БНСУ)

3. Ким Жон Су (БНАСАУ)

УСАНД СЭЛЭЛТ:

Эрэгтэйчүүдийн 100 метрийн мэлхий сэлэлтэд манай тамирчин Болдбаатарын БҮТЭХ-ҮЙЛС хоёрдугаар гараанд уралдаж 1:10,80 амжилт үзүүлж 63 дугаар байрт орлоо. Түүний ард Катар, Оман, Кук арлын сэлэгчид орсон байна.

ЖҮДО: Эрэгтэйчүүдийн 60 кг-ийн жинд манай гавьчат тамирчин, Афины олимпийн хүрэл медальт Хашбаатарын ЦАГААНБААТАР эхний тойрогтоо Израйлийн бөх Галь Екютелийг барсангүй. Барилдааны үндсэн цаг болох 5 минутад хоёр бөх хэн хэнээсээ үнэлгээ аваагүй байна. Ингээд нэмэлт цаг сунгаж барилдаад 26 секунд өнгөрч байхад Цагаанаа кока үнэлгээ алдан ялагдлаа. Израйлийн бөх дараагийн тойрогт Францын бөхөд ялагдсан тул Цагаанаа дагаж барилдах эрхгүй болж, үзэгчдийн суудал руу шилжлээ.

Эр. 60 кг:

1. Чой Мин Хо (БНСУ)

2. Людвиг Пэйшер (Австри)

3. Ришод Собиров (Узбекистан)

Рубен Хоукес (Холланд)

Эм. 48 кг:

1.Алина Думитру (Румын)

2.Янет Бермой (Куба)

3.Паула Парето (Аргентин)

Рюоко Тамура Тани (Япон)

ХҮНДИЙГ ӨРГӨЛТ: Мөн Олимпийг зохион байгуулагч БНХАУ анхны алтаа энэ өдөр авлаа.

Эмэгтэй. 48 кг.

1. Чэнь Шиэ Шиа (БНХАУ) 212 кг(95+117) (Олимпийн рекорд)

2. Сибель Озкан (Турк) 199 кг(88+111)

3. Чэнь Вэй Лин (Тайвань) 196 кг(84+112)

ДУГУЙ: Эр. Бөөн гараатай замын уралдаан.

1.Самуэль Санчес (Испани)

2.Давид Ребеллин (Итали)

3.Фабьен Канчельяра (Швейцарь)

ТУЯЛЗУУР ЖАД: Эм.ганцаарчилсан.

1.Мариэль Загунис (АНУ)

2. Сэйда Якобсен (АНУ)

3. Бекка Уорд (АНУ)

Эхний өдрийн дараа Олимпийн рекорд хоёр удаа эвдэгдэж, нийтдээ 19 орны тамирчин медаль хүртээд байна.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

ОЛИМПИЙН ТОСГОНООС МЭДЭЭЛЖ БАЙНА-5

2008-08-09T11:40:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

ОЛИМПИЙН ТОСГОНООС МЭДЭЭЛЖ БАЙНА-5

Зуны Олимпийн XXIX наадмыг сурвалжилж буй “ТАВАН ЦАГАРИГ”-ийн тусгай сурвалжлагч Ж.ОТГОНЦАГААН, Ж. БАТМӨНХ нар “Бээжин-2008” Олимпийн тосгоноос мэдээлж байна.

Бээжин супер, Лондон ?

“Бээжин-2008” олимпийн наадмын нээлт тасархай сайхан болсныг хамт үзсэн ҮОХ-дын мэргэжил нэгтнүүд шагшин магтаж байлаа. Стивен Спилбергийн оронд ажилласан Хятад үндэсний боловсон хүчин, киноны алдарт найруулагч Жан Юй Моу, түүний туслах Жан Жи Жан, Чен Вей Яа нарын бүтээлийг дэлхий даяараа өндөр үнэллээ.Ийнхүү олимпийн нээлтийн ажиллагаа яруу болсон нь K.Мойнихан тэргүүтэй Лондон-2012 зохион байгуулах хорооныхныг гүн бодолд автуулсан гэнэм.

Бамагийн тулаан

Олимпийн наадамд эмэгтэй туйванчдаа төлөөлөн хоёр дахь удаагаа хүч сорих гэж буй Н. Баярмаа энэ жил жин өгсөж 63 кг-ийн жинд өрсөлдөнө. Түүний жинд 20 тамирчин өрсөлдөх бөгөөд захиалсан ачааны даацын дагуу “В” хэсгийн 3-т бичигдлээ. Зөвхөн Алжир, Мексикийн тамирчид манай хүнээс илүү захиалсан бол Тунис, АНУ,Боливи, Польш, Венесуэлийн туйванчид ард нь байна. Харин 10 тамирчинтай “А” хэсгийн томчуудыг ОХУ-ын С.Цукарева хэмээх Орос бүсгүй тэргүүлж буй агаад Хятадын иргэн байсан Менесса Ма Яа Кахастаны нэрийн өмнөөс оролцож, 2-т байгаа бол Норвегийн туйванч 3 дугаарт бичигдэж байна. Тэмцээн VIII.12-нд 10:30-aaс Бээжин хотын их сургуулийн зааланд эхэлнэ.

Олимпчид олимпчиддоо хайртай

MYOX-ны дэд ерөнхийлөгч , “Moсква-80” Олимпийн наадмын мөнгөн медальт Ц. Дамдин Олимпийн наадамд оролцогчдын чуулга уулзалтанд оролцов. Түүнийг өндрийн харайлтийн олимпийн аварга Фосбюри Чао Ян цэцэрлэгт зохион байгуулсан бөгөөд ОУОХ-ны удирдлагууд, үе үеийн олимпчид цугларчээ.

Сайдын илгээлтээс оюутны захидал

Монголын багийн штаб уруу спортод элэгтэй олон хүмүүс холбоо барьж, амжилт хүссээр байна. Гавъяат дасгалжуулагч Ч. Дамдиншарав , боксын гавъяат Н. Энхбат, Монголын Элчин сайдын Яам , “Таван цагариг” сонин, MCS компани гээд л … Хамгийн сүүлд МУИС-ын Байгалийн аялал жуулчлалын ангийн I курсын оюутан Чулуунбатын Жавзанпагма хувийн захидал ирүүлж, амжилт хүсчээ. Та бүхэнд баярлалаа.

сэтгэгдэл бичих

[сэтгэгдэл бичих]

АМЕРИКУУД МОНГОЛООС ХОЁР ДАХЬ ОЛИМПИЙН АВАРГЫГ “ТӨРҮҮЛЛЭЭ”

2008-08-08T18:12:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

АМЕРИКУУД МОНГОЛООС ХОЁР ДАХЬ ОЛИМПИЙН АВАРГЫГ “ТӨРҮҮЛЛЭЭ”

Хэдхэн хоногийн өмнө Америкийн спортын нэр хүндтэй “SPORTS ILLUSTRATED” сэтгүүлийн редакц “Бээжин-2008” Олимпийн наадмын спортын 38 төрлийн, 302 цогц медалийн эзэд хэн хэн болох талаар өөрсдийн таамгыг дэвшүүлсэн билээ. Үүний дотор Монголын тамирчин , боксын 54 кг-ийн жинд тоглох Э.Бадар-Ууган алтан медаль, жүдогийн 60 кг-ийн жинд зодоглох Х.Цагаанбаатарыг хүрэл медаль авна гэснийг манай спорт сонирхогчид “амны бэлгээс ашдын бэлгэ” хэмээн хүлээн авсан. Тэгвэл өнөөдөр буюу Зуны олимпийн XXIX наадмын нээлт болох өдрийн (08.08.2008) Америкийн үндэсний өдөр тутмын гол хэвлэл болох “USA TODAY” сонин мөн л “Бээжин-2008” олимпод хаанахын хэн гэдэг тамирчин алт, мөнгө, хүрэл медаль авахыг спортын төрөл, зай тус бүрд нэгбүрчлэн гаргасан байна.

Бахархууштай нь бас л Монголын нэг бус тамирчны нэрийг олимпийн медальтнуудын тоонд оруулжээ. Ялангуяа чөлөөт бөхийн 55 кг-ийн жинд Монголын Баяраагийн НАРАНБААТАР алтан медаль хүртэж, дэлхийн аварга, ОХУ-ын бөх Бесик Кудуков мөнгө, Беларусийн Риван Гажиев, Узбекистаны Мансуров нар хүрэл медаль зүүнэ гэж таамаглажээ.

Мөн боксын 54 кг-ийн жинд ОХУ-ын Сергей Водопьянов Олимпийн аварга болж, Германы Рустам Рахимов мөнгө, Монголын Энхбатын БАДАР-УУГАН , Тайландын Ворапаж Петчкум нар хүрэл медаль авна гэж бичжээ.

Манайхны найдвар тавьж буй жүдо бөхийн 60 кг-ийн жинд Австрийн Людвиг Пэйшер алт авч, Холландын Рубен Хоукес мөнгө, БНСУ-ын Чой Мин Хо , Гүржийн Нестор Кержиани нарыг хүрэл медаль хүртэнэ гэсэн байна. Манай Х.Цагаанбаатарын болон бусад жүдочдын нэр медаль “авах” бөхчүүдийн дунд алга.

Эмэгтэйчүүдийн сдортын болон хийн гар бууны төрөлд бид О.Гүндэгмаа, Ц.Мөнхзул нарыгаа ямар ч байсан нэг “юм дуулгана” гэж хүлээж байгаа. Харин “Sports Illustrated” ч , “USA Today” ч Монголын “мэргэн буучдыг” тооцоонд оруулахгүй байна.

Эцэст хэлэхэд дээрх үүнд нэг их баярлаж хөөрөөд, эсвэл гутаж гунихраад байх зүйл ердөө ч байхгүй. Энэ бол зөвхөн тухайн сонин, сэтгүүлийн редакцийн л байр суурь, таамаглал юм. Гэхдээ бас ямар ч байсан Америкийн нөлөө бүхий хэвлэлүүд Монголын тамирчдыг ийнхүү үнэлж, Монгол Улс “Бээжин-2008” олимпийн наадмаас хоёр медаль, тэр дундаа алтан медаль хүртэж, Олимпийн аваргатай болно гэснийг ихэд бэлгэшээхээс өөр яалтай. Ерөөл бат оршиг ээ!

Ц.Энхтүвшин (“ТАВАН ЦАГАРИГ”)

сэтгэгдэл бичих

[сэтгэгдэл бичих]

БОКСЧИД МААНЬ ХААНАХЫН ХЭНТЭЙ ТААРАВ?

2008-08-08T11:53:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

“Бээжин-2008” Зуны Олимпийн ХXIX наадмын боксын тэмцээний сугалаа өнөөдөр өглөө боллоо. Энэ удаагийн олимпод манай дөрвөн “ширэн бээлийтэн” оролцож байгаа бөгөөд урьд өмнөх Олимпийн наадмаас манай боксчдоос гавьяат тамирчин Нэргүйн Энхбат 1988 оны Сөүлийн олимпоос, гавьяат тамирчин Намжилын Баярсайхан 1992 оны Барселоны олимпоос тус тус хүрэл медаль авч байсан билээ.

48 кг-ийн жинд ОУХМ, Азийн аварга Пүрэвдоржийн СЭРДАМБА эхний тулаанаа наймдугаар сарын 13-ны оройн 19.15 цагаас Угандын боксчин Рональд Серготай хийнэ. Түүнийг ялбал дараа нь Испанийн Хосе Линарес-АНУ-ын Луис Янес нарын хэн хожсонтой нь учраа таарна. Сэрдамба маань хоёрдахь учраагаа ялсан тохиолдолд (Америкийн боксчин байх болов уу) шилдэг наймд үлдэх юм.

Наймд үлдсэн тохиолдолд нөгөө талаас Украйн-ОХУ, Куба-Тажикистан, Гана-Филиппин, Марокко-Бразилийн тамирчдаас шалгарч үлдсэнтэй таарахаар байна. Оноолтын дагуу ОХУ-ын боксчин, дэлхийн аваргын мөнгөн медальт Давид Арапетян (Өнгөрсөн жилийн ДАШТ-д манай Сэрдамбыг хожсон) , Кубын Ямпьер Эрнандес Гонзалес нар хоорондоо таарахаар (хоёул эхний тойрогт хожсон тохиолдолд) байгаа бөгөөд энэ хоёрын аль хожсон нь хагас шигшээд гарч ирэх байх.

Энэ жингийн хамгийн хүчтэй өрсөлдөгч олимпийн хүрэнл медальт, дэлхийн хошой аварга БНХАУ-ын боксчин Зү Ши Минь нөгөө хэсэгт орсон тул алтын төлөө тулаанд л түүнтэй таарах магадлалтай юм.

54 кг-ийн манай гавьяат тамирчин, дэлхийн аваргын мөнгөн медальт, Ази тивийн аварга Энхбатын БАДАР-УУГАН эхний тулаанаа наймдугаар сарын 12-ны оройн 21.45 цагаас Мексикийн Оскар ВАЛЬДЕС-тай хийнэ. Түүнийг ялбал хоёрдугаар тойрогт Алжирын Абдел Халим Оурради-Ирландын Жон Жоэ Нэвин нарын ялагчтай тоглох юм.

Эхний хоёр тойрогт ялсан тохиолдолд Бадараа маань шилдэг наймд үлдэх бөгөөд медалийн төлөө Марокко-Колумб, Австрали-Ботсваны боксчдоос шалгарсантай нь хүч үзнэ.

Ингээд медалийн болзол хангасан тохиолдолд нөгөө талаас ОХУ-ын боксчин, дэлхийн аварга Сергей Водопьянов-дэлхийн аваргын хүрэл меальт Пуэрто-Рикогийн МэкЖой Арройя, Английн боксчин , дэлхийн аваргын хүрэл медальт Жон Мюррей (Энэ боксчин манай Бадар-Ууганд өнгөрсөн жилийн ДАШТ-д мөнгөн медалийн төлөө тулаанд ялагдсан)-Хятад, Беларусь-Македон, Франц-Энэтхэг нараас тунаж үлдсэнтэй таарахаар байна. Энэ дундаас ОХУ-ын Водопьянов бараг л гараад ирэх болов уу? Тэгвэл манай Бадараа өнгөрсөн жилийн ДАШТ-ий алтан медалийн төлөө түүнд шүүгчдийн эргэлзээтэй торгуулийн оноогоор хожигдсон “даагаа нэхэх” боломж гарахаар байна. Ер нь Бадар-Ууган маань тун сайхан сугаллаа. Медальд бол баттай хүрэхээр харагдана, түй, түй…

Энэ жингийн хэцүү учраанууд болох Тайландын Ворапаж Петчкум, Казахстаны Канат Абуталипов, Кубын Янкель Леон Аларкон, БНСУ-ын Сун Чуль Хан,Италийн Витторио Парри нар бүгд нөгөө хэсэгт орсон, алтан медалийн төлөө тоглохоос наана таарахгүй гэсэн үг юм.

57 кг-ийн жинд ОУХМ, Ази тивийн аварга Зоригтбаатарын ЭНХЗОРИГ наймдугаар сарын 11-ний оройны 19.45 цагаас эхний тулаанаа Марокко улсын тамирчин Махди Оуатинтай хийнэ. Түүнийг ялсан тохиолдолд дараа нь Кубын боксчин, Пан Америкийн наадмын аварга Идел Торрьенте- Ганын Принц Октолус Зани нарын хожсонтой нь учраа таарах юм. Кубын боксчин энэ хосд төвөггүй ялах биз. Ингэхээр манай Энхзориг хоёрдугаар тойрогт Кубын боксчинтой таарах магадлал байна. Хэрэв түнийг ялбал шилдэг наймд үлдэх бөгөөд Ботсван-Гүрж, Казахстан-Азербайжан нараас шалгарсантай нь медэлийн төлөө тоглох оноолттой байна. Энэ жингийн дэлхийн аварга ОХУ-ын Альберт Селимов нөгөө хэсэгт оржээ.

64 кг-ийн жинд ОУХМ, Зүүн Азийн надмын аварга, олимпод хоёр дахь удаагаа оролцож буй Уранчимэгийн МӨНХ-ЭРДЭНЭ эхний тоглолтоо наймдугаар сарын 10-ны оройны 19.30 цагаас Замби улсын боксчин Хастингс Бвалиатай хийнэ. Түүнийг ялбал хоёрдугаар тойрогт Афины олимпийн хүрэл медальт, Европын аварга Болгарын Борис Георгиев, АНУ-ын Хавьер Молина нарын хэн хожсонтой тулалдах болно. Энэ хоёрын хэн хожсоныг ялсан тохиолдолд манай Мөнх-Эрдэнэ маань шилдэг наймд үлдэх бөгөөд медалийн төлөө Гана-Англи, Франц-Литва боксчдоос шалгаран гарч ирсэнтэй нь таарах юм. Ингэхээр манай Мөөгий хоёдугаар тойрогт л маш сайн тоглож ялалт байгуулбал медальд хүрэх “зам нээлттэй” болохоор байна. Хэрэв нэгэнт медалийн болзол хангавал мөнгөн медалийн төлөө Ирланд-Унгар, Доминикан-Армен, Иран-Тунис, Руанда-Пуэрто Рикогийн хэсгээс шалгарсантай таарах учир өнгөө хувиргах ч боломж гарч мэднэ.

Энэ жингийн томчуул болох дэлхийн хошой аварга Казахстаны Серик Сапиев, Тайландын Манус Бумжумнонг, Европын аварга, дэлхийн аваргын мөнгөн медальт ОХУ-ын Геннадий Ковалев, Кубын Росниэл Иглесиас нар бүгд нөгөө хэсэгт орсон учир финалаас наана нь таарахгүй юм.

Манай “ширэн бээлийтнүүд” маань гайгүй л сугаллаа. Олимпийн дэвжээнд ямар сул өрсөлдөгч гэж байх биш. Гэхдээ боломж бол байна. Одоо өөрсдөө л ухаантай, дайчин тоглох хэрэгтэй. Тэгвэл медаль (ямар ч өнгөтэй байж болно) тийм ч “хол” биш ээ.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

МАНАЙ ЖҮДОЧДИЙН УЧРАА ТОДОРХОЙ БОЛЛОО

2008-08-07T22:46:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

МАНАЙ ЖҮДОЧДИЙН УЧРАА ТОДОРХОЙ БОЛЛОО

“Бээжин-2008” Зуны олимпийн XXIX наадмын жүдо бөхийн тэмцээн наймдугаар сарын 9-15-нд Бээжингийн Шинжлэх ухаан , Технологийн Их сургуулийн спортын ордонд болох бөгөөд Монголын багаас хамгийн олон тамирчин оролцох спортын төрөл юм. Тиймээс ч манайхан жүдогийн тэмцээнд анхаарлаа ихээхэн хандуулж, найдлага ч их тавьж байгаа. “Цагаан өмсгөлтнүүд” маань өмнө нь Олимпоос нэг мөнгө, гурван хүрэл медаль авчирч байсан түүхтэй.

Өнөөдөр жүдо бөхийн барилдааны техникийн зөвлөгөөн болж, сугалаа хийгдлээ. Жүдо бөхийн тэмцээний урьдчилсан барилдаан өдрийн 12 цагаас эхэлж, шигшээ барилдаан тухайн өдрийн оройн 18 цагаас эхлэн явагдаж, медалийн эзэд тодрох юм.

Энэ удаа жүдочдоос “Афин-2004” олимпийн хүрэл медальт, гавьяат тамирчин эрэгтэйчүүдийн 60 кг-ийн жинд Хашбаатарын ЦАГААНБААТАР хамгийн эхлээд буюу наймдугаар сарын 9-ний 12 цагаас татами дээр гарах юм. Манай бөхийн эхний учраа нь Израйлийн жүдоч Галь Екютел. 27 настай энэ бөх Европын АШТ-ий хүрэл медальтай , Дэлхийн цомын болон Супер Дэлхийн цомын мөнгө, хүрэл медаль хүртэж байсан аж. Манай жүдоч Израйлийн бөхийг ялбал хоёрдугаар тойрогт Францын Дмитрий Драгинтай, Гүржийн Нестор Кержиани нарын хэн ялсантай барилдах юм. Францын хар арьст бөх Дэлхийн цомын хошой алтан медальтай . Харин Гүржийн Кержиани бол олон жил тогтвортой сайн барилдаж буй бөх билээ. Тэрбээр Афины олимпийн хүрэл медальтай бөгөөд дэлхийн аваргын мөнгө, хүрэлтэй туршлагатай жүдочдын нэг. Манай Цагаанаа ч түүнтэй нилээд хэд таарч барилдаж байсан учир барилдааныг нь сайн мэдэх байх. Хэрэв энэ хоёр барилдаанд манай Цагаанаа ялбал хэсгийн аваргын төлөө ОХУ-ын Руслан Кишмаков- Йемений Али Хусруф, Хятадын Лю Рэн Вэнь- Казахстаны Саламат Утурбаев нараас шалгаран гарч ирсэнтэй нь барилдах юм. Цагаанбаатарын дээр дурьдсан бөхчүүдийг хэнийг нь ч ялах бүрэн боломжтой бөгөөд сугалаа ээлтэй таарсан гэж болох юм. Нэг үгээр хэлэхэд медаль авах магадлал ихээхэн байна.

Наймдугаар сарын 10-нд эмэгтэй жүдочдын “салхийг” ОУХМ Мөнхбаатарын БУНДМАА хагална. 52 кг-ийн жинд нийт 22 бөх барилдах бөгөөд манай Бундмаа эхлээд Испанийн Ана Карраскосатай барилдана. Хэрэв түүнийг ялбал хоёрдугаар тойрогтоо БНХАУ-ын бөх, 2004 оны Олимпийн аварга Шянь Дүн Мэйтэй учраа таарах ажээ. Хятадын бөхийг ялсан тохиолдолд ОХУ-ын А.Харитонова-Португалын Тельма Монтеро нарын хэн ялсантай хэсгийн аваргын төлөө барилдах оноолт таарчээ.

Наймдугаар сарын 11-нд эрэгтэйчүүдийн 73 кг, эмэгтэйчүүдийн 57 кг-ийн жингийн барилдаан болно. 73 кг-ийн жинд ОХУМ Гантөмөрийн ДАШДАВАА эхний тойрогт АНУ-ын бөх Райан Ресертэй хүч үзнэ. Америкийн бөх дэлхийн цомын хошой хүрэл медальтай юм билээ. Гэхдээ Дашдаваа ялах бүрэн боломжтой. Хэрэв түүнийг хожвол дараа нь Польшийн Кржиштоф Вилкомирски-Латвийн Всеволод Зелёныс нарын хэн давсантай нь хүч үзнэ. Латвийн бөх олимп, дэлхийн хүрэл медальтай, Польшийн бөх дэлхийн аваргын хүрэлтэй. Дашдаваа хоёр давбал хэсгийн аваргын төлөө Канадын Николас Триттон-Португалын Жоао Пинту,Японы Юсүкэ Канамару-Ираны Али Маламат нараас шалгарсантай нь барилдана.

Эмэгтэйчүүдийн 57 кг-ийн жинд гавьяат тамирчин, дэлхийн аваргын хүрэл медальт Хишигбатын ЭРДЭНЭТ-ОД барилдана. Олимпийн наадамд дөрөв дэх удаагаа оролцож буй манай хашир туршлагатай бөх маань эхний тойрогт гоц мөргөсөн. Хоёрын даваанд Германы Ивонне Бониш- Италийн Жюлия Чинтавалле нарын хэн ялсантай нь хүч үзнэ. Германы бөх бол 2004 оны олимпийн аварга, ДАШТ-ий хошой мөнгөн медальтай шилдэг жүдочдын нэг.

Манай Эрдэнэт-Од энэ даваанд давбал Францын бөх Европын аварга Барбара Харел- БНАСАУ-ын бөх, Олимпийн алт, мөнгө, хүрэл медальт, Дэлхийн дөрвөн удаагийн аварга, мөн мөнгө, хүрэл медальт Ки Сун Хуй нарын давсантай учраа таарах юм. Эрдэнэт-Одын хувьд нилээд хүндхэн хэсэгт сугаллаа. Гэвч аваргыг ялж авара болдог гэдэг үг байдаг даа.

Наймдугаар сарын 12-нд эрэгтэйчүүдийн 81 кг, эмэгтэйчүүдийн 63 кг-ийн жингийнхний барилдаан болно. Манай ОХУМ Дамдинхүүгийн НЯМХҮҮ эхний тойрогтоо гоц мөргөнө. Харин хоёрдугаар тойрогт 2005 оны аварга, 2007 оны ДАШТ-ий хүрэл медальт Холландын бөх Гильоме Элмонттой таарсан. Түүнийг давбал Пуэрто-Рикогийн Б.Абдеррамал- Италийн бөх , Сиднейн Олимпийн аварга Жузеппе Маддалони нарын хэн ялсантай нь учрахаар байна. Хэрэв хоёр давчихвал хэсгийн аваргын төлөө Тунис, Монтенегро, Экваторын Гвиней, БНХАУ, Арубагийн бөхчүүдээс шалгарсантай хүч үзэх оноолттой юм.

Эмэгтэйчүүдийн 63 кг-ийн жинд ОУХМ манай Түмэн-Одын БАТТӨГС эхний тойрогт гоц мөргөнө. Дараа нь дэлхийн аваргын хүрэл медальт Германы бөх Анна вон Харниер-Америкийн Самао улсын Силулу А Этону нарын хэн ялсантай барилдана. Хэрэв хожвол ДАШТ-ий мөнгө, хүрэл медальт ,Францын жүдоч Люсе Декоссе , Словений бөх олимп, дэлхийн хүрэл медальт Урска Золнир-Израйлийн бөх Элис Шлезингер нараас шалгарч гарсантай нь хэсгийн аваргын төлөө барилдана.

Наймдугаар сарын 14-нд эрэгтэйчүүдийн -100 кг-ийн жинд ОУХМ Найдангийн ТҮВШИНБАЯР эхлээд Афины олимпийн аварга, дэлхийн хошой аварга Японы бөх Кэйжи Сузукитай барилдана. Түүнийг ялбал ОХУ-ын Руслан Гасымов-Германы Бенжамин Берла нарын хожсонтой таарахаар байгаа.

Эдгээр учраануудыг ялж, хоёр давбал хэсгийн аваргын төлөө Венесуэл-БНСУ, Куба-Австралийн бөхчүүдээс шалгарч гарч ирсэнтэй хүч үзэх юм.

Мөн энэ өдөр эмэгтэйчүүдийн -78 кг кг-ийн жинд ОУХМ Пүрэвжаргалын ЛХАМДЭГД эхлээд гоц мөргөөд дараа нь БНХАУ-ын Ян ШюЛи-Киргизстаны Елена Проскуракова нарын хэн давсантай нь барилдаж, дараа нь Австралийн Стефани Грант-Канадын Мэрилайз Левески нарын ялагчтай учраа таарна. Харин хэсгийн аваргын төлөө өрсөлдөхөөр болбол Италийн бөх олимпийн хүрэл медальт Люсиа Морико,Японы бөх дэлхийн аваргын хошой мөнгөн медальт Сае Наказава, дэлхийн аваргын хошой хүрэл медальт Бразилийн Эдинанси Сильва, ОХУ-ын Вера Москалюк,Испанийн Эстер Сан Мигель нараас хэн шалгарч гарч ирсэнтэй таарахаар байна.

Наймдугаар сарын 15-нд эрэгтэйчүүдийн +100 кг-ийн жинд ОУХМ Махгалын БАЯРЖАВХЛАН эхний тойрогт гоц мөргөх бөгөөд дараа нь Европын хошой мөнгөн медальт Польшийн Януш Воянаровичийг ялбал Узбекистаны бөх, дэлхийн аваргын хошой хүрэл медальт Абдулло Тангриев- Европын аварга Германы Андреас Толзер нарын хожсонтой хүч үзнэ. Дийлсэн тохиолдолд Францын бөх дэлхийн аварга Теди Рине болон Тунисын Анис Чедли, Австралийн Семир Пепич,Елдос Ихсангалиев нараас шалгарсантай нь хэсгийн аваргын төлөө барилдана.

Эмэгтэйчүүдийн +78 кг-ийн жинд гавъяат тамирчин Доржготовын ЦЭРЭНХАНД эхний тойрогт гоц мөргөнө. Дараа нь Холландын Карола Уиленхоедтой барилдан ялбал хэсгийн аваргын төлөө Казахстаны Гульжан Иссанова-Польшийн Урсула Садковска болон Словений бөх, дэлхийн аваргын мөнгөн медальт Люсия Полавдер нарын давсантай нь барилдана.

Олон Улсын Жүдо Бөхийн Холбоо нь Азийн Жүдо бөхийн Холбооны онооны системийг эс зөвшөөрч нэг улсаас нэг тамирчин хоёр жинд эрх авбал аль нэгийг нь хүчингүй болгоно гэсэн шийдвэрийг өнгөрөгч сарын сүүлчээр гаргаснаас эрэгтэйчүүдийн 66 кг-ын жинд барилдах ёстой байсан ОУХМ С. МИЯРАГЧАА тэмцээнд оролцох боломжгүй болжээ. Энэ жинд гавъяат тамирчин Х. Цагаанбаатар цуглуулсан оноогоороо тивдээ тэргүүлж, эрх авсан боловч дээрхи шийдвэрийн дагуу түүнийг дэлхийн аваргаас эрх авсан 60 кг-д орохыг зөвшөөрч, үлдсэн 66 кг-д авсан эрхийг цуцалсан байна.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

“БЭЭЖИН-2008”-ийн ЭРГЭН ТОЙРОНД

2008-08-07T17:50:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

“БЭЭЖИН-2008”-ийн ЭРГЭН ТОЙРОНД

Зуны олимпийн ХХIХ наадмын нээлтийн ёслолын ажиллагаа эхлэхэд ганцхан хоног үлдлээ. Хүн төрөлхтний аугаа их баяр наадмыг үзэхээр сэтгэл доглон, тэсч ядан хүлээж буй спортын хорхойтнууддаа “хоолны өмнө шийр зугаа” болгон бичл хэдэн мэдээг хүргэе.

Сүлд дууг ямар хэл дээр дуулах вэ?

“Бээжин-2008” Олимпийн албан ёсны сүлд дуу нээлтийн ёслолын ажиллагааны үеэр анх удаа олны сонорыг мялаах ажээ. Уг дууг Их Британийн поп од Сара Брайтман дуулах бөгөөд түүнтэй Хятадын дуучин Лю хуань хорших гэнэ. Харин зохион байгуулагчид одоог хүртэл Олимпийн сүлд дуу ямар хэл дээр дуулагдахыг нууцалж байгаа юм байна.

Хэдэн цаг үргэлжлэх вэ?

Зуны 29 дүгээр Олимпийн наадмын нээлтийн ажиллагаа “Шувууны үүр” нэртэй Олимпийн төв цэнгэлдэх хүрээлэнд орон нутгийн цагаар оройн 8 цагаас эхэлнэ. Нээлтийн ёслолын ажиллагаа нилээд хэдэн цаг үргэлжлэх агаад шоу тоглолт гэхэд л 75 минут, Олимпод оролцох 205 орны баг тамирчдын парад гэхэд 2,5 цаг үргэлжлэх ажээ.

“За” ба “Үгүй” гэсэн Төрийн тэргүүнүүд

Олимпийн нээлтийн ажиллагаанд дэлхийн улс орны 95 төрийн тэргүүн оролцохоор албан ёсоор мэдэгдээд байгаа юм байна. Эдний дотор АНУ-ын Ерөнхийлөгч Жорж Буш, ОХУ-ын Ерөнхий сайд Владимир Путин, Японы Ерөнхий сайд Ясуо Фукуда гэх мэт томчууд байгаа аж. Мөн “Бээжин-2008” олимпийн нээлтэд оролцохыг албан ёсоор татгалзсан тэргүүнүүд ч байна. Тухайлбал НҮБ-ын Ерөнхий нарийн бичгийн дарга Пан Ги Мун, Германы Канцлер Ангела Меркель, Польшийн Ерөнхийлөгч Лех Качиньский, Украйны Ерөнхийлөгч Виктор Ющенко нар Бээжинд ирэхээс татгалзжээ.

Олимпийн бамбарыг хэн асаах бол?

Олон хүн “Бээжин-2008” олимпийн бамбарыг хэн асаах бол хэмээн сонирхож байгаа нь лав. Зарим сурвалжаас үзэхэд Олимпийн бамбарыг нэг биш бүүр таван хүн асаах юм гэж мэдэгдэж байгаа. Олимпийн бэлгэдэл таван цагариг, мөн “Бээжин-2008” олимпийн бэлгэдэл сахиус ч мөн тавын тоотой болохоор магадгүй л хэрэг. Гэхдээ БНХАУ-ын алдарт гимнастикч Ли Нинь Олимпийн бамбарыг асаана гэсэн мэдээ бас түгээд байна. Хятадын домогт гимнастикч Ли Нинь №%,- оны ДАШТ-ээс зургаан алтан медаль хүртэж, 1984 оны Лос Анжелесийн олимпоос гурван алт, хошой мөнгө, нэг хүрэл медаль авч байсан манай гаригийн шилдэг тамирчны нэг юм. 1988 онд гэмтлийн улмаас зодог тайлж, их спортоо орхисон Ли Нинь 1990 онд “LI NING” хэмээх өөрийнхөө нэрээр нэрлэсэн спортын хувцас хэрэгслийн компанийг байгуулсан бөгөөд эдүгээ тус компанийн Ерөнхийлөгч бөгөөд захирлуудын зөвлөлийг удирддаг гэнэ. Энэ дашрамд өгүүлэхэд “Бээжин-2008” олимпод оролцох Монголын баг тамирчид “Li Ning” фирмийн хувцасаар гангарах дөхсөн бөгөөд эцсийн мөчид сүмогийн их аварга Д.Дагвадоржийн ивээн тэтгэлгээр Японы “MIZUNO” фирмийн спортын хувцсыг сонгосон билээ.

Хоёр Солонгос тусдаа жагсана

“Сидней-2000”, “Афин-2004” Олимпийн наадмын нээлтийн ажиллагаанд нэгэн тугийн доор жагссан Өмнөд болон Хойд Солонгосын баг тамирчид энэ удаа тус тусдаа жагсахаар болжээ. Энэ нь өнгөрсөн хоёрдугаар сард Засгийн эрхийг авсан БНСУ-ын Ерөнхийлөгч Ли Мюн Бакын консерватив үзэлтнүүд урьд өмнөх нааштай хэлэлцэгдсэн бүхий л гэрээ, хэлэлцээрийг цуцалсантай холбоотой гэнэ.

Сагсчин тугчид

Олимпийн нээлтийн ёслолын ажиллагааны гол цөм нь оролцогч орнуудын баг тамирчдын парад байдаг. Уламжлал ёслолын тамирчдын жагсаалыг Олимпийн өлгий нутаг Герекийн баг тамирчид манлайлан цэнгэлдэхэд орж ирэх бөгөөд хамгийн төгсгөлд нь зохион байгуулагч БНХАУ-ын баг тамирчид явах юм. Улс орныхоо Төрийн далбааг барьж жагсах тугчин болох хүндтэй үүрэг тамирчин болгонд заяадаггүй билээ. Тиймээс ч хамгийн шилдэг тамирчдаараа ҮОХ-д Төрийнхөө далбааг залах тугчнаар томилдог ажгуу. Энэ олимпод сагсчдыг тугчнаар сонгосон орон цөөнгүй байна. Тухайлбал ОХУ-ын тугийг “Юта жазз” багийн тоглогч Андрей Кириленко, БНХАУ-ын тугийг “Хьюсто рокитс”-ийн тоглогч Яо Минь, Германы тугийг “Даллас маверикс” багийн Дирк Новицки нар нээлтийн ажиллагаанд барьж жагсах нь. Хоёр метрээс дээш өндөртэй , чацархаг тугчид үнэхээр сүрлэг сайхан харагдах биз ээ. Манайх хэдийгээр сагсчин байхгүй ч багтаа л хамгийн биерхүүд тооцогдох , жүдоч М.Баяржавхланг Монголын багийн тугчнаар сонгосон нь бас ийм нарийн учиртай ч байсан байж мэднэ. Учир нь Монголын олимпийн гол найдварууд болох Б.Наранбаатар (чөлөөт бөх , 55 кг), Х.Цагаанбаатар (жүдоч, 60 кг), Э.Бадар-Ууган (бокс, 54 кг) гээд ихэнх нь “хөнгөн жингийнхэн” билээ.

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]

ОЛИМПИЙН ӨДРИЙН ТЭМДЭГЛЭЛ-VIII.07

2008-08-07T14:48:00Z

[блог: TUVSHEE'S BLOG/TAVAN TSAGARIG/,бичсэн: tavantsagarigusa]

Зуны олимпийн XXIX наадмын хөлбөмбөгийн тэмцээн Олимпийн нээлтийн ёслолын ажиллагаанаас хоёр хоногийн өмнө буюу өчигдөр “гэзэгт” хөлбөмбөгчдийн тоглолтоор эхэлснийг бид мэдээлсэн. Өнөөдөр (08.07) эрэгтэйчүүдийн хэсгийн эхний тоглолтууд явагдлаа. “Бээжин-2008” Олимпийн хөлбөмбөгийн эрэгтэйчүүдийн тэмцээнд урьдчилсан тэмцээнээс шалгарсан шилдэг 16 баг өрсөлдөж байгаа.

“А” хэсэгт Аргентин, Автрали, Серб, Кот д’ Ивуар

“В” хэсэгт Холланд, АНУ, Япон, Нигери

“С” хэсэгт Бразил, БНХАУ, Бельги, Шинэ Зеланд

“Д” хэсэгт Итали, Камерун, Хондурас, БНСУ –ын багууд оноолт таарсан. Хэсгээсээ нэг, хоёроор шалгарсан багууд цаашид хасагдах журмаар тоглох юм.

Олон Улсын Хөлбөмбөгийн Холбооны (FIFA) болон ОУОХ-ны хамтарсан журам ёсоор Олимпийн наадамд 23-аас доош насны тоглогчид оролцох ёстой байдаг. Гэхдээ баг тус бүр бүрэлдэхүүндээ 23-аас дээш насны гурван тоглогч авахыг зөвшөөрдөг билээ.

“Бээжин-2008” Олимпийн наадмын хөлбөмбөгийн эрэгтэйчүүдийн тэмцээний аваргын төлөө өрсөлдөх гол багт Өмнөд Америкийн хоёр орон тооцогдож байна. Мэдээж хөлбөмбөгийн “уран дархчууд”, “ид шидтэнүүд” гэгддэг Бразилчууд ямар ч тэмцээнд аваргын л төлөө өрсөлддөг. Бразилийн Олимпийн багийг шигшээ багийн дасгалжуулагч Дунга удирдаж буй бөгөөд супер од Роналдиньо тэргүүтэй Пато, Диегу, Андерсон, Жо, Марсело, Брену гээд Европын шилдэг багуудад тоглодог, хэдийнэ “од” болсон тоглогчид байгаа нь тэднийг хамгийн хүчтэй өрсөлдөгч гэж зүй ёсоор нэрлэхэд хүргэж байгаа билээ. Дээр нь Бразилийн хөлбөмбөгчид Олимпийн аварга цолыг хэзээ ч хүртэж байгаагүй. Тэгэхээр тэдэнд алтан медаль авах маш их хүсэл мөрөөдөл байгаа нь улам давуу байдал олгож буй байх.

Тэдний гол өрсөлдөгч нь “мөнхийн дайсан” хөрш Аргентин нь. Афины олимпод хожигдох нь бүү хэл хаалгандаа ганц ч гоол алдалгүй түрүүлсэн Аргентиний хөлбөмбөгчид бүрэлдэхүүний хувьд Бразилиас огтхон ч дутахгүй. Лионель Месси, Агуэро, Банега, Гагу нарын залуу одод дээр хашир туршлагатай Рикельме, Машерано нарыг дурьдахад л хангалттай. Өнгөрсөн жил залуучуудын дэлхийн аварга болсон бүрэлдэхүүн дээрээ түшиглэсэн энэ баг финалд торолгүй үлдэх болов уу? Дашрамд дурьдахад Афины олимпийн аварга, Английн “Ливерпуль”-д тоглодог Машеранод Олимпийн хошой аварга болох боломж ч байна.

Эхний тоглолтуудаас харахад цаг агаарын байдал маш халуун, бүгчим байгаа нь хөлбөмбөгчдийн “гол өрсөлдөгч” болж буй нь тодорхой. Хэрэв цаг агаарын энэ байдлыг давж чадвал Итали, Холланд, Сербийн багууд медалийн төлөө өрсөлдөх бүрэн боломжтой. Холланд сүүлийн хоёр залуучуудын Европын аваргад түрүүлсэн бол Сербийн залуус өнгөрсөн жил Европт үзүүрлэж байсан хүчтэй багаа ирүүлжээ.

Харин цаг агаарт ажралгүй тоглох , тэгээд биеийн хүчний бэлтгэл, тэвчээрээр өрсөлдөгчдөөсөө ялгардаг Африкийн багууд бас л медалийн төлөө гараад ирэхэд гайхах зүйлгүй. Сүүлийн гурван олимпийн хоёрт нь “Хар тив”-ийн хөлбөмбөгчид аваргалсныг ч мартаж болохгүй. Ялангуяа гурван жилийн өмнө залуучуудын дэлхийн аваргын шигшээ тоглолтод шалгарч байсан тоглогчдоо авчирсан Нигерийн баг тун хүчтэй өрсөлдөх болов уу?

За ямар ч байсан олимпийн ногоон талбайд дэлхийн хэмжээний одод, хүчтэй өрсөлдөгчид, нэр алдарт хүрэхийг хүсч буй шижигнэсэн залуус бүгд л байна. Тэгэхээр үнэхээр сонирхолтой тоглолтууд гарах нь гарцаагүй ээ. Ингээд эхний тоглолтуудын дүнг сонирхуулья.

“А” хэсэг

АРГЕНТИН- КОТ Д’ ИВУАР 2:1

“Челси”-ийн Саломон Калу тэргүүтэй Дрогбагийн нутгийн хөлбөмбөгчид Аргентиний хүчирхэг багтай тун тэнцүү өрсөлдөв. Ялалтын бөмбөгийг аргентинчүүд тоглолтын цаг дуусахаас ердөө дөрөвхөн минутын өмнө оруулсан. Тоглолтын “салхийг” Аргентиний шигшээ “БАРСА”-ийн залуу од Месси 43 дахь минутад хагалсан бол Кот д’ Ивуарын Сесси 53 дахь минутад тооны харьцааг тэнцүүлсэн. Эхний үед Аргентинчүүд талбайн гол хэсэгт “ноёрхож”, илүү гоё тоглолт үзүүлж байсан бол хоёрдугаар үед Хятадын халуун нар, бүгчим агаар тэднийг сульдаасан нь Африкчуудад илүү боломж олгосон юм. Гэсэн хэдий ч тоглолтын төгсгөлд Мессигийн гайхамшигт дамжуулалтын ачаар Акоста өрдөө хөл тавиад л хожил багтаа авчирлаа. Кот д’ Ивуарын багаас Жервиньо хэмээх залууг онцлон дурьдах хэрэгтэй. Уран гоё хууралт, оновчтой дамжуулалт , хурд гээд шилдэг хөлбөмбөгчид байх бүх чанар энэ 21 настай залууд байна. Одоогоор Францын “Ле Ман” багт тоглож буй Жервиньо удахгүй Европын томоохон багуудад очих буй заа. Та бүхэн ч нэрийг нь тогтоогоод авчихад илүүдэхгүй байх. Жервиньо гээд бразил нэртэй ч жинхэнэ нэр нь Жерве Яо Куасси юм билээ шүү!

АВСТРАЛИ-СЕРБ 1:1

“В” хэсэг

АНУ-ЯПОН 1:0

Япончуудад энэ өдөр жаахан аз дутсан төдийгүй, шүүгчийн эргэлзээтэй шийдвэрүүд хожигдол авчирлаа. Тоглолтын сүүл хэсэгт шүүгч гарцаагүй “пенальти”-г Японы багт өгөөгүй юм.

ХОЛЛАНД-НИГЕРИ 0:0

“С” хэсэг

БРАЗИЛ-БЕЛЬГИ 1:0

Тоглолтын цорын ганц гоолыг Бразилийн шинэ оддын нэг Эрнанес 79 дэх минутад оруулсан. Алдарт Роналдиньо Бразилийн багийн ахлагчийн туузыг зүүн талбайд гарсан.

БНХАУ-ШИНЭ ЗЕЛАНД 1:1

“D” хэсэг

ИТАЛИ-ХОНДУРАС 3:0

Италичууд гурван гоолын хоёрыг нь 11 метрийн торгуулийн цохилтоос орууллаа.

БНСУ-КАМЕРУН 1:1

Ц.Энхтүвшин (“Таван цагариг”)

сэтгэгдэл бичих

[сэтгэгдэл бичих]